15 лістапада – Дзень беларускага радыё

«Увага! Гаворыць Мінск!» – менавіта з гэтых слоў 15 лістапада 1925 года пачалася эпоха радыёвяшчання ў Беларусі.

У гэты дзень Першы Нацыянальны канал Беларускага радыё выйшаў у эфір. 

Першая радыёстанцыя РВ-10 імя Саўнаркама БССР, якая была ўсталявана ў цэнтры Мінска на вуліцы Савецкай, магла ахопліваць радыус да 300 кіламетраў, а першая перадача доўжылася ўсяго 30 хвілін за суткі. Але нават з такім абмежаваным эфірам гэта быў сапраўдны прарыў той эпохі.

Гістарычныя традыцыі, якія былі закладзены першым беларускім радыё, падтрымліваюцца і развіваюцца многімі пакаленнямі спецыялістаў па электрасувязі. Так з 1944 года работа па развіццю радыёсеткі атрымала новы імпульс: у Прылуках быў заснаваны Беларускі прыёмны радыёцэнтр для арганізацыі радыёсувязі і прыёму радыёвяшчання, а праз дзесяцігоддзі было сфарміравана дзяржаўнае прадпрыемства «БелДІЭ», радыёчастотны орган і орган дзяржаўнага нагляду за электрасувяззю ў Рэспубліцы Беларусь.